Ua maea le mataupu i le va o le faipule filifilia o le Itumalo o Gagaemauga No.1 le afioga ia Tuala Tevaga Ponifasio o se sui o le vaega faaupufai a le Faatuatua i le Atua Samoa ua Tasi (FAST) ma le sui na tagi le afioga ia Laufou Alofipo Faamanu Manase o le sui o le HRPP ma ua tonu ai ia Laufou e toe faaui i tua lana tagi na faia faasaga ia Tuala.

Taua e Tuala i fafo ane o le potu faamasino “Ua toe soalaupule le finagalo a Laufou ina ia toe ave i tua lana tagi ma na fai foi talosaga a Saleaula ma Lealatele lea ua talia ma le agaga maualalo e Laufou”.

O Tuala na manumalo mai i le faigapalota tele na faia i le Aso 9 o Aperila i le aofaiga o palota e 644 tulaga lua ai Laufou Alofipo i palota e 337. O Tuala foi sa tauva o se sui tutoatasi ma na tuu iai le avanoa e filifili poo ai le vaega fauapufai e agai ai ma ia tusi aao ai i le FAST  lea e oo mai le taimi nei e to’a 26 ai sui o lea vaega faapufai.

Taua foi e le afioga ia Laufou i le maea ai o le faamasinoga “o le agaga lava o le Atua ua fai ai lenei faaiuga aua na tatalo mai foi si o matou itumalo ma si o matou nuu o Saleaula. E fai aso le Atua  ma o le agaga ma le faamoemoe ia tatou faia measili e manuia ai Samoa.”

Na faafetaia ai e Tuala le afioga ia Laufou ona o lona finagalo e ave ai tua lana tagi na faia faasaga ia te ia ma ua malie foi Tuala e ave foi i tua lana tagi na faia faasaga ia Laufou ae o le ā la ō e fai le la itumalo e tausi pea le filemu ma le fealofani.