I le savalia ai nei o le lua tausaga talu ona toe tatala tuaoi sa tapunia ona o le faama’i Koviti-19, ma afaina ai le tele o pisinisi e pei o taavale togipau poo car rentals, o lea ua faatuina nei se asosi e tapuvae tasi iai le mafutaga a pisinisi taavale togipau e 20 i Samoa.

O sui o le asosi o ni pisinisi ua iloga i lea auaunaga.

Faaalia e le tamaitai Pelesetene o le asosi le afioga Liliolelagi Annette Chang, o le tāua o le latou faalapotopotoga o le maua ai o le avanoa e faasoa i auala e fesoasoani ai le isi pisinisi i le isi i faafitauli, aemaise o lu’itau e feagai pea ma ia ituaiga o pisinisi ona o le faagaioia o se auaunaga o taavale togipau, e lē taugofie pe a fua i le aafia o taavale i ni faalavelave.

O le afiafi o le Aso Tofi na faalauiloa aloaia ai lea faalapotopotoga ma le talitonuga o le Pelesetene, e iai nisi o pisinisi taavale togipau o le a avea ma sui o le asosi.

Faaalia e Liliolelagi Annette Chang, o aafiaga i le taimi o le faama’i koviti e ogaoga ma na tapunia ai lava nisi o pisinisi ona ua telē se aafiaga o le itu tau tupe maua ma ua lē gafatia ai ona totogi nonogatupe ma isi auaunaga tāua.