Ua sui le finagalo o le minisita o le Immigration ma ua faatonuina ai nei le faia faavavevave o se suesuega tutoatasi faasaga i le faiga o visa o loo iai nei i lalo o le polokalame ua ta’ua o le Accredited Employer Work Visa scheme.
O visa faigaluega nei o loo faia uma ai lava e fale faigaluega le faaiuga e ala i le sailia ma tuuina atu visa faigaluega i tagata o loo su’e mai fafo, ma e oo mai ananafi ua lata i le 81,000 afe visa faigaluega ua talia e pulega ua mae’a laiseneina e le Immigration, poo le 27,900 accredited employers.
E ui i le amata alia’e o lipoti o loo faapologa e nisi o pulega tagata faigaluega na aumai, poo tagata nei na totogi le faitau afe o tupe e faatalosaga ai visa faigaluega ae omai iinei e leai ni galuega, na fai mai le minisita Andrew Little e leai se iloiloga.
Peitai o le vaiaso nei lava na toe maua ai e le minisita faamatalaga e leai ni suesuega o faia faasaga i pulega nei e faamatuu atu iai le laisene ma le talitonuga latou te sailia maia tagata faigaluega mai fafo.
E 115 tagata faigaluega mai Initia ma Bangladesh o lea ua maua o loo faaomiomia i totonu o le 6 fale i totonu o Aukilani, ma o fale foi nei e lē lelei.
Ua tapa ai foi e le minisita le komesina o galuega a le malo, Peter Hughes poo faafefea ona sailia ae poo fai foi ni siaki i pulega faapea avanoa faigaluega.
A o faasolo lenei suesuega tutoatasi ua galulue le matagaluega o pisinisi lea e iai i lalo le Immigration, e toe faatalosaga isi visa faigaluega mo tagata faigaluega aafia, saili nisi galuega poo le toe tapena e toe foi.
Ae mo isi o loo faasauni e omai ma e fesootai ma pulega nei ua toe maua, o lea ua fesootai iai le Immigration e aua le omai se’i toe fesootai atu.
