O se faipisinisi i Hawkes Bay ma se tasi o ana kamupani ua faatonuina e toe totogi le $96,000 mo faaletonu na alia’e i le faatinoina o totogi o le aufaigaluega.

O se suesuega sa faia ia Malcolm Herbert ma lana kamupani faufale Mah Enterprises Ltd lea na amata ia Me 2021, ina ua agai se tasi o le aufaigaluega i le matagaluega o Pisinisi ma galuega ma faailoa iai e lei maua sona totogi mo aso malolo o le tausaga e manatu e tatau ona agavaa iai.

O tuuaiga la faasaga i lea alii faipisinisi ma le kamupani sa faia e le tagata asiasi o galuega leipa lea na ia faailoa e lei mafai ona tuuina atu e Herbert faamatalaga e faamalamalama ai vaega o faamaumauga o galuega o loo misi.

Fai mai le lipoti e 42 taimi ua solia ai e le faipisinisi lea ma lana kamupani le tulafono o Galuega, Employment Relations Act ma le Holidays Act ma tuuina loa iai ma le faaiuga e toe totogi lea vaegatupe ma o le ‘afa o lea aofaiga o le a vaevae i le aufaigaluega na aafia i lea mataupu.