O se Kerisimasi fiafia le faaiuga a le faamasinoga mo le susuga Feo Petelo ma lona aiga, ina ua talia ai e le faamasinoga lana talosaga e ala i lana loia, ia toe mafai ona ulufale ma nofoia le fale sa ia fausia i luga o le fanua o Apisai Esera sa ia lisiina i se vaega o le pitonuu o Lotopa talu mai le tausaga e 2018.

Na sulu i le faamasinoga Feo Petelo ina ua finau atu lē e ana le fanua ia totogi le siitaga fou e 160 tala o le lisi i le masina.

Na amata le lisi i le 800 tala i le masina, ae o Aokuso o le tausaga nei na faaopoopo ai loa le 160 tala, ma o ia suiga o loo aiaia i le maliega o le lisi, peitai na oo le mataupu i le faamasinoga ina ua poloka le auala i le fanua ma le fale, taofi le toe maua o le suavai ma le eletise i se gaioiga a lē e ana le fanua.

Na lē mafai ai ona maua e lē na tagi nisi o meatotino tāua mai le fale e pei o lavalava, aemaise o taumafa i le latou pusaaisa, fai mai le faaiuga a le faamasinoga e mautinoa ua faaletonu ona ua titina le eletise.

Ua faatonuina ai lē e ana le fanua e tatau ona toe faaola le vai ma le eletise e totogi e ia, ma ia aveese uma loka ma apa atofale ua pupuni ai le auala.

Ua fautuaina lē na tagi afai e lē faia e lē ua ave iai le faatonuga lea tulaga, ia alu e faaola uma ia auaunaga ma aveese vaega o loo loka ai le auala, ae o lana lisi o loo totogi o le a toesea ai ana seleni o le a faaalu i le faia o lea galuega.

Ua fautuaina e le faamasinoga lē e ana le fanua o loo lisi ai lē ua tagi ma o loo faia ai sana pisinisi e ao ona suesue e le faamasinoga i se tulaga auiliili le mataupu.

Mo lē na tagi e na te lē o talia le siitaga e 160 tala o le lisi, i lana mau o loo tau totogi ana nonogatupe na faatū ai lana pisinisi, ma fau ai le fale o loo faamautu ai i luga o le fanua o lē ua molia.