O molimau a leoleo e pei o le pauta faasāina o le aisa, o se paipa e ula ai le aisa, ma se masini e fua ai le mamafa poo se electronic scale lea na maua i se osofa’iga i le fale o se aiga i Fatausi i Savaii, ua teena ma ua lē talia e le Faamasinoga Maualuga ona avea ma mau a leoleo, ina ua manumalo le finau a lē na molia ma lana loia sa finau ai e le’i faamalieina aiaiga faaletulafono i le faatinoina e leoleo o le osofa’iga poo se drug raid e faapea na maua ai ia nakoti ae sa faatino lea gaioiga e aunoa ma se tusi faataga poo se search warrant.
Na finau loia a leoleo sa faaaogā le malosi’aga faaletulafono o leoleo o loo aiaia i le vaega 14A o le tulafono o nakoti e mafai ai ona latou ulufale i se nofoaga poo se fale e fai ai su’esu’ega e aunoa ma se pepa faataga.
Peitai o le mae’a ona fofogaina o mau a lē ua molia ma lana loia faapea molimau a leoleo na faatinoina le osofa’iga, na manino ai le faamasinoga o le galuega na faatino e leoleo e le’i faamalieina aiaiga faaletulafono.
Ua fautuaina ai e le faamasinoga le matagaluega o leoleo, falepuipui ma le toe fuata’ina e tatau ona toe a’oa’o lelei malu o le malo i le tulafono, ina ia o latou silafia ai aiaiga e tatau ona faatino pe afai e alu se osofa’iga e sa’ili ai se nofoaga e pei o se fale o masalomia i se gaioiga tau solitulafono e faasino i laau ma fualaau faasāina e lē mana’omia ai se pepa faataga.
O le mataupu lenei tau faamasinoga o loo molia ai Letasi Peter Pesamino i lona umia o le 16 tesimale 8 kalama o le aisa le methamptamine, o se paipa ma se masini e fua ai le mamafa.
O ia vaega sa tuuina atu e leoleo i le aso o le a su’esu’e ai molimau i le masina na te’a nei o Tesema, peitai ina ua manumālō le talosaga a lē ua molia ma lana loia sa finau ai e le’i faia le osofa’iga e tusa ma ala o le tulafono, na faatonuina ai e le faamasinoga i ana faai’uga le teena o ia vaega uma sa tapena e leoleo e avea ma latou mau e lagolago ai moliaga o Letasi.
