O loo i Samoa sui o le Australian Force e faatautaia ni aoaoga taualoa mo sui o autaaalo a le atunuu, taumafaiga ina ia faaauau pea ona atina’e taaloga i totonu o Samoa.  

O lenei polokalame na mafai ona tatala aloaia e le afioga i le Minisita o Aoga ma Alaga’oa mo le Fiafia o Tagata, Laumatiamanu Ringo Purcell. 

Mo le silafia o lenei polokalame e aofia ai aoaoga taualoa i le tomai faalaufalī, o tomai faafaiaoga, o tulaga o le faatino ai o toleniga, faapea le tomai e tali atu i ni faafitauli tau i le soifua maloloina (first aid) ma aoaoga i luga o tomai e silafia ma malamalama ai i le tulaga o iai le malosi ma le agavaa o le tama poo le teine taalo.  

Ta’ua e le tamaitai ia Melisa Seumanu o le Asosi o le Pasiketipolo a Samoa (Samoa Basketball Association) o loo ia te ia le naunautaiga i le maua o lenei avanoa o le a mafai ona faalauaitele ai lona iloa i nisi o itu o le taaloga, ae faapea le faalauaitele o sona silafia i le aogā o le iai o se tagata taalo i se tulaga malosi ma lelei.  

Na faaopoopo mai Melissa, o le a ia taumafai e pue nisi o vaega tāua e siitia ai foi lona silafia ma le malamalama i le taaloga o le pasiketipolo.  

O loo faasolo lea polokalame i le vaiaso atoa lenei.