O le aso ananafi na tuuina atu ai lipoti, i se faalavelave mata’utia na tula’i mai i le faaitu o Waitārere Beach, i le maliu ai o se tagata e to’atasi ae manunu’a ni tagata e to’atolu.
Faaalia e leoleo ni faamatalaga mata’utia e tusa ai ma lea matāupu; e faapea a o le’i alia’e lea faalavelave, na ave’ese e leoleo se laaumalosi, o ni ututau mai lea nofoaga i le Aso Lua.
Ae ua faate’ia malu o le malo i le alia’e mai o se faalavelave mata’utia i lea lava nofoaga i le na o ni nai itula mulimuli ane, e pei ona o latou maua atu ai se alii ua maliu ma le to’atolu ua aafia i ni manu’aga tūgā mai se laaumalosi.
Faamauina i lipoti, e iai le talitonuga sa vili e se tamaitiiti le numera o faalavelave faafuase’i mo leoleo le 111 i le te’a tēisi lava o le 12 i le vaveao o le Aso Lulu; e faapea e na o le vili lava e lea tamaitiiti o le telefoni ae e le’i talanoa atu i le tagata o loo i le isi itu o le laina.
Faamaonia e leoleo, sa iai sui na aga’i atu i lea fale mo nofoaga i se taimi o le afiafi, ina ua oo atu faamatalaga o loo iai se ’au’upega – o se laaumalosi i le fale, ma sa o latou aga’i atu foi i lea lava aiga i nai aso ua tuana’i ona o ni aafiaga ma ni tulaga lē saogalemū o iai le aiga.
O loo faasolo su’esu’ega a leoleo i lea matāupu.
O lea ua faaalia faamatalaga i lē ua maliu, o Benjamin Harry Timmins e 60 tausaga le matua.
O i latou na manunu’a, o se tama’ita’i e 46 tausaga le matua, ma ni alii talavou e to’alua e 17 ma le 21 tausaga le matutua, o loo iai pea i le falema’i i Ueligitone. Faamanino mai o se teineitiiti na iai i lea nofoaga i le taimi na tupu ai lea faalavelave, ua faatasi atu nei o ia ma aiga.
Puna o Faamatalaga: https://www.rnz.co.nz/news/national/584096/police-seized-gun-from-family-s-home-hours-before-fatal-waitarere-beach-shooting
