Search

Faate’ia Aukilani i faafiafiaga a le Aufaipese o le Mana Moana

O le faamoemoe ua taunuu o le laau lea o le ola, ae ua leai foi ni upu e faamatalaina ai le lelei ma le faamaoni o le Atua ina ua tau lau o le faamoemoe na tapena iai le aufaipese lauiloa o le Mana Moana e ala i lana koneseti sa faia i le Spark Arena i le afiafi o le Aso Faraile ua mavae atu 24 o Novema.

O le saunoaga lea a le afioga ia Fepuleai Helen Tupai ina ua mae’a le faamoemoe a le Mana Moana sa alo atu iai.

O le agaga o le faafetai ina ua tini talosaga sa tuuina atu i le Atua amaise o le lagolago o le mamalu o le atunuu o Samoa faapea isi atunuu o le Pasifika sa auai atu ua tu matie ma tu matila ma maualuga ai lea afiafi.

Ma e leai se lagona o le tulaga lea e oo iai lea afiafi ina ua latou maitauina le tumu faasolo atoa o totonu o le fale ma lagona leo o tagata ma sisiva a o faagasolo le polokalame i le po atoa.

Sa auai susuga i faafeagaiga ma o latou faletua o tamā ma tina matutua faapea fanau ua faatumulia ai totonu o le fale, ma ua latou fiafia ina ua latou faalogoina le suiga ua iai le lagiina o nisi o pese tuai sa tuufaatasia e le aufaipese.

O le suifefiloi o fatuga o le po, ma le mālū o leo faatasi ai ma le mālie o le fofoga o le afiafi le susuga ia Tofiga Fepuleai sa lē nofonofo lelei ai tagata i lalo i le sisiva ma feei i luga. 

O le taimi muamua lenei ua fai ai se koneseti a le Mana Moana i totonu o Aukilani ma o se koneseti maoa’e lea e itiiti le taimi sa tuufaatasia ai le aufaipese ae sa iloga le matagofie o le loto e tasi ma le galulue faatasi o tagata uma o le aufaipese.

E eseese nofoaga e nonofo ai tagata e auai i le aufaipese, o isi e nonofo i Aukilani ae o isi e nonofo i Uelegitone ma e faigata ona tuufaatasi tagata uma, ae o le auala sa fai sa pue leo o vaega taitasi ona lafo mai lea i tagata o le aufaipese ina ia iloa e le tagata le vaega e usu ai.

O le Aso Lulu sa tuufaatasia ai le aufaipese atoa i Aukilani faatasi ai ma le fa’ili a le New Zealand Symphony Orchestra ae Aso Faraile loa faataunuu le faamoemoe e pei ona iai.

Ma o le isi lea tulaga sa lagona ai lava le fiafia o le afioga ia Fepuleai Helen Tupai ma le aufaipese o le tasi o le aso sa tuufaatasi ai tagata uma ma faataoto le polokalame mo le Aso Faraile ae sa iloga lona taunuuga lelei.

Tala sili ona faitaulia

SAMOA UPDATE

TALA FOU MAI SAMOA

Keep uptodate with Radio Samoa activity & promotion

* indicates required