O le faatautoina o i latou e toasefulu mai le Malo tele o Amerika i lalo o le polokalame a pisikoa i Samoa nei ua faaigoaina o le Kulupu 93 lea sa taunuu mai i le masina o Iulai.

Ina ua mae’a ai le sefulutasi o vaiaso o feagai ai i le aoaoina o le gagana Samoa aemaise tu ma le aganuu, o le asō na faatino ai le faatautoga o i latou nei a o lei amatalia la latou galuega fesoasoani i aoga tulagalua o le a galulue ai mo le lua tausaga.

Saunoa le Minisita o Aoga, Seuula i le tāua o lenei polokalame talu lona faavae mai e fesoasoani tele lea i taumafaiga a le Matagaluega o Aoga.

“Ua 56 tausaga talu ona faatautaia mai lenei polokalame ma ua silia ma le 2,000 pisikoa mai Amerika sa galulue punouai e fesoasoani i le Malo o Samoa aemaise i le itu tau aoaoga auā fanau lalovaoa a Samoa.

“Talu ona auina mai sui nei mai Amerika o se tulaga ese lea i alo ma fanau aoga tulagalua i nuu ma afioaga i tua ua iai se palagi ua mafai ona aoaoina latou i le gagana Peretania ma ua tele se sao i le atina’eina o aoaoga ia i latou.

“O lea e momoli ai le faafetai tele lava i le Malo o Amerika e tusa ai o lenei fesoasoani tele mo Samoa ina ia mautinoa e leai se tamaititi e feagai ma faafitauli i le faitautusi ma le tusitusi.”

O le kulupu lenei o le lona 93 ai lea o malaga a pisikoa mo lenei tausaga ma e muamua ona faatino aoaoga auā le nofo sauni ai a o lei agai e faatino la latou galuega.

O vaega na agai ai le 11 vaiaso o le gagana ma tu ma aga faa-Samoa faapea ai ma le aoaoina o le saogalemu lautele ma le tulaga o le ola soifua maloloina a o iai i le galuega.

Na faaalia e le sui o le Malo o Amerika i Samoa nei, Noriko Horiuchi o lenei polokalame o se faailoga lea o le faalauiloaina o aganuu a Samoa ma Amerika.

“Ia manatua o outou o loo faalauiloaina aganuu ma ia tautua faamaoni, ma a iai ni faafitauli e lolofi mai i le savaliga ia maua le loto onosai a ia finafinau i la outou auaunaga.”

Mai i le vasega o le Kulupu 93 na faatauto na fai ai le tamaitai ia Leilua Megan Weston e momoli le faafetai e tusa ai o le valaauina o i latou i lenei auaunaga aemaise o le afioaga sa aumau ai i le 11 vaiaso o le aoaoga.

“Faafetai i le afioaga o Mulifanua i le talileleia o le matou kulupu e ala i nisi o vaega o la matou aoaoga auā le aoaoina o le gagana ma le aga faa-Samoa o aiga sa o matou malu ai faafetai le agalelei.

“Faafetai i Pule Aoga ma aoga taitasi sa taliaina la matou fesoasoani mo alo ma fanau o aoga uma o le a matou galulue ai.

“O matou pisikoa e tele ni vaega tāua matou te mananao e faasoa atu mo fanau a Samoa.

“O nisi vaega e ala lea i aoaoga o le fesootaiga i le aganuu ma le agaifanua, e eseese uma foi tomai ma agavaa ua iai i pisikoa ae tasi lava le faanaunautaiga ina ia atina’e le faitautusi ma le tusitusi o alo ma fanau i le lua tausaga.

“I le 11 vaiaso sa feagai ai e ui ina tele luitau sa feagai peitai sa faaalia le onosai o se mea lea e tatau ona mitamita ai ina ua faamae’aina ma le manuia lenei aoaoga ae sauni loa e faatino le auaunaga na mafua ai le oo mai i Samoa.”

E toavalu pisikoa o le a feagai ma galuega faafaiaoga i le motu tele i Salafai i nisi o aoga tulagalua ma le toalua o le a galulue i aoga i Upolu.