O le maea faatauto ma faailoa Minisita Lagolago fou e to’afa mai faipule e toalima o le vaega faaupufai a le Faatuatua i le Atua Samoa ua Tasi na manumalo i palota laiti ia Novema tausaga na te’a nei ua taoto mai ai nei e lua Matagaluega ua to’alua Minisita Lagolago. 

O ia Matagaluega e aofia ai Galuega Tetele a le Malo ma le Matagaluega o Faatoaga ma Faigafaiva. O le maea ai foi ona faatuto ia Minisita Lagolago Fou ua faia ai ma se fetuunaiga i le see ane o le sa avea ma Minisita Lagolago i le Matagaluega o Fesootaiga ma Faamatalaga Tekonolosi le afioga Magele Sekati Fiaui i le Matagaluega o Tupe lea sa avea ai le Minisita o Tina ma Tamaitai afioga Leota Laki Lamositele ma Minisita Lagolago. 

O le Matagaluega foi o Punaoa Faalenatura ma le Siosiomaga ma le Pulega o Tagata Tafafao Maimoa mai Fafo sa leai se Minisita Lagolago lea ua tofia ai le sui faipule o Aleipata Itupa i Lalo ia Faleomavaega Titimaea Tafua.  

O le sui faipule o Falealupo ia Fuiono Tenina Crichton ua avea nei ma Minisita Lagolago a le Matagaluega o Fesootaiga ma ma Faamatalaga Tekonolosi, le afioga Laumatiamanu Ringo Purcell o le sui faipule o le Itumalo Safata No.2 ua avea ma Minisita Lagolago lona lua mo le Matagaluega o Galuega Tetele a le Malo ma ua galulue faatasi ma le tasi o Minisita Lagolago o lea lava Matagaluega na mua’i filifilia ai le susuga Niuava Eti Malolo faapea le susuga Maiava Fuimaono Tito le sui faipule o Falealili No.2 o le Minisita Lagolago lona lua o le Matagaluega o Faatoaga ma Faigafaiva ua galulue faatasi ma le susuga i le Minisita Lagolago ia Vaele Paiaaua Iona Sekuini. 

E toatasi le sui faipule na manumalo i palota laiti e le’i filiiflia o se Minisita Lagolago o le afioga lea ia Tagaloatele Pasi Poloa o loo toesea ma le atunuu ona o ni siaki faafomai i Niu Sila.