O le taeao o le Aso Lulu 27 o Aperila na faataunuuina ai le faatautoga a le afioga Tagaloatele Pasi Poloa o le Minisita Lagolago a le Matagaluega o Pisinisi, Alamanuia ma Leipa i se sauniga na faia i le potu fono a le Kapeneta.
E pei ona silafia o le afioga Tagaloatele sa filifilia e avea ma sui faipule o le Itumalo faapalota o Sagaga No.4 ina ua maea le faigapalota laiti i le masina o Novema peitia e le’i mafai ona faatautoina i le masina o Fepuari o le tausaga nei ona sa malaga atu i Niu Sila mo siaki faa fomai.
Na momoli ai le faafetai a le taitai o le atunuu le Tamaitai Palemia Fiame Naomi Mataafa i le Atua ma ave ai le faamalo i le Minisita lagolago ua maea ona faatauto ma faamanuia ai foi i lona tulai mai i le tofi.
Na ia faamalamalama foli tulaga taua o le tofiga Minisita Lagolago; “O le fa’amoemoe ina ia galulue fa’atasi ma Minisitā e poupou ma lalago fa’atasi la tatou galuega ia ‘aua ne’i i ai se isi e lē o’o i ai le auaunaga. O lona uiga e le’o se avanoa fa’atauva’a ua tofia i ai a outou afioga i Minisitā Lagolago, o tofiga o Minisitā Lagolago o le avanoa e pei ona ou tā’ua muamua e fa’amasani ai i galuega fa’apulega e ‘ese mai i galuega fa’apalemene e pei ona i ai Komiti ua tofia ma valaauina ai fo’i lo outou pāia e galulue ai”
Na ia taua foi “I totonu lava ia i galuega tau pulega e tāua tele ona tausoa fa’atasi ma a outou Minisitā a outou galuega ina ia outou galulue fa’atasi ai e oloolo pito va’a fa’atasi i la tatou galuega”.
