Ua amata aoaoga mo le puipuiga o le atunuu a le Matagaluega o Leoleo e tapena ai i nisi o polokalame tetele o le a talimalo ai Samoa e pei o le Fonotaga a faauluuluga o malo o le taupulega (CHOGM) i le tausaga 2024.
O se tasi o vaega o nei aoaoga ua faailoa ai se suiga se tasi o laasaga a le Matagaluega e ala i se atina’e ua faaigoaina o le Remote Piloted Aircraft System (RPAS) faatasi ai ma le Faalapotopotoga o Tusi Pasi Taualoa e ala i aoaoga na faatautaia i Fagalii (Police drone training).
O ia meafaigaluega faaonaponei poo drones e fesoasoani i galuega tetele a le Matagaluega ma o aoaoga i le faaaogāina o nei meafaigaluega o se galuega faapaaga a Samoa ma Leoleo a Ausetalia.
Ta’ua e le Sui Ofisa Sili ia Angelo Chan Mow i le Samoa Global le aogā o nei aoaoga aua e lē na o le faimeaalofa mai o drones ae tāua le iloa faaaogā.
I le masina o Mati o le tausaga nei na iloilo ai e le Faalapotopotoga o Tusi Pasi Taualoa le SQA aiaiga uma o lenei aoaoga (course) ma faamaonia i le masina o Aperila le ausia uma e le Drone Training o vaega e tatau ona ausia mo aoaoga i le atunuu.
Ta’ua foi e le Sui komesina o Leoleo Papalii Monalisa Tia’i Keti o se fesoasoani tele i galuega uma a le Matagaluega aemaise o taimi o palota, o asiasiga faalemalo o le a faaaogā ai nei meafaigaluega faaonaponei.
