O le tausaga nei e atoa iai le 12 tausaga talu ona faamanatu i totonu o Niu Sila le Vaiaso o le Gagana Samoa ma o le tausaga nei o loo taulamua ai faalapotopotoga e 3 i le faatinoga o polokalame e aofia ai FAGASA, Motu o Malama ma le SAASIA.
E mataina fuafuaga ma tapenaga o lenei tausaga ona o le ogatusa o le vaiaso faamanatu o le gagana Samoa i Niu Sila nei ma le faamanatuina o le 60 tausaga talu ona tuto’atasi Samoa mai pulega faakolone.
O le autū o lenei tausaga ua faaupuina faapea, “Faaauau folauga i le Vaa o Tautai” ‘Continue the voyage with Competent Wayfinder’s of the Ocean”. Ua faauigaina e le toatele poo le ā le faigata o le folauga ia agai pea i luma ma faaauau le savaliga.
Na tatala aloaia i le aso 29 lea vaiaso faapitoa ma o le a mae’a i le aso 4 o Iuni 2022. Ua mae’a foi ona vaevaeina nisi o faafiafiaga ma polokalame eseese a komuiniti a Samoa i totonu o Niu Sila auā lava le patipatia o lenei matati’a tāua ma le vaiaso faapitoa o le Gagana Samoa.
