Ua ave le faamamafa i le toe atinaeina o faatoaga fualaauaina ma fualaau faisua mai i laueleele lava o Samoa e tau faaititia ai le aafia o tagata i faama’i lē pipisi ona o le faalagolago i meaai toe gaosia poo processed food.
O le tiute a le malo o le unaia lea o auala o puipuiga mo le Soifua lelei o tagata o le atunuu mai aafiaga o faama’i lē pipisi ona o taumafa ua lē paleni e mafua lea i le tele o taumafa eseese mai fafo ua o latou faaaogaina e tausi ai le soifua.
O le aso faailogaina o taumafa i le lalolagi o lenei tausaga na faataua ai foi le aso o fualaauaina taumafa mata faapea fualaauaina faisua. Ua ave le faamalosiau ma le tuualalo a le tamaitai Palemia le afioga Fiame Naomi Mataafa i le faailogaina o lenei aso faapitoa i le toe atinae lea o faatoaga i le atunuu o se tasi o manulaiti a lana faigamalo o loo iai nei.
Taua e Fiame “E tusa ma ripoti sa tuufaatasia e le FAO ma le Matagaluega o le Soifua Maloloina e faatatau i le tulaga o le malu puipuia o taumafa ma le taumafa tatau o tagata Samoa sa manino ai o le toatele o le faitau aofai o tagata matutua o Samoa Ia aafia i faama’i lē pipisi ona o le lē taumafa tatau i meaai paleni.”
Na ia taua foi “O loo faailoa mai foi i nei ripoti le siitia o le tagata Samoa ua aafia i nei ituaiga faama’i aemaise ua amata ona aafia ai ma tupulaga talavou o le atunuu, o le ala lea e ave pea le faamamafa ma le faataua a le Mālō i auala eseese o puipuiga ina ia unaia ai le taumafa tatau ma meaai paleni ma le maua pea o taumafa mo Samoa i taimi uma.”
