O le sao o tina ma tamaitai o alala ma nonofo i nuu i tua poo rural women, ua faatāua e le faalapotopotoga o tina a Malo Aufaatasi poo le UN women, ona o tina ma tamaitai i nuu i tua e tele naua lo latou sao i le atinaeina o faatoaga, pisinisi laiti, ma le galuega tauave i aso taitasi o le tausiga o fanau ma tagata o aiga e ala i le latou pitolaau o le gasese o taumafa, fafaga fanau ma faamautu le saogalemu ma soifua lelei o tagata o o latou aiga.

E 45 ni atinae pisinisi laiti o le a faalauiloa i se polokalame o lea faamoemoe o le a faagasolo i lenei vaiaso, o le a silasila ai le Malo ma sui o le faalapotopotoga o tina a Malo Aufaatasi i le tulaga ua ausia e tina o le tatou atunuu o loo alala i nuu ma afioaga i tua.

E pei ona silafia o le toatele o tina nei o loo faatino a latou pisinisi laiti i se polokalame a se tasi foi faalapotopotoga tuma’oti mai fafo o loo nonō atu ai seleni i tina ma tamaitai e faagaioi ai a latou pisinisi laiti.

O le tasi o autu tāua o lea taumafaiga ina ia tafiesea le ola mativa o tagata, ae ia iai se isi fesoasoani e toomaga iai mo le atinaeina o aiga.

O le vaiaso atoa lenei o le a faagasolo ai polokalame o lea faamoemoe o loo taulamua ai le matagaluega o tina ma tamaitai, atinae o afioaga ma agafesootai.