Ua galulue faatasi nei le Matagaluega o Tina ma Tamaitai Atiina a’e o Afioaga ma Aga Fesootai ma le Matagaluega o Aoga Taaloga ma Aganuu, i se faigapaaga ma le Malo o Ausetalia e faamaopoopo le aoina mai o finagalo o faiaoga, ulu aoga ma fanau aoga e saga faatāua ai aoaoga sauoo poo inclusive education.
O se taumafaiga lenei o loo autu i le aofia o tagata e iai manaoga tumau i le atiina a’e o aoaoga ma ia ausia ai tulaga tutusa i le avanoa o tagata ma fanau uma a le atunuu i soo se aoaoga.
O le aoina mai o finagalo ia ausia ai lea manulauti ua faaalia i se pepa o faamatalaga o se tulaga e tāua, i le fausia ai o se taiala e limataitaiina ai le faatāua o aoaoga sauoo ma avanoa tutusa ai tagata i le maua o aoaoga ae o le sini, ia aua nei faapito manu ia tasi.
O loo iai le faamoemoe o le a galulue faatasi ia matagaluega a le Malo e faatino se faalauiloa e saga faatāua ai le momoliina atu o le feau i le lautele o tagata i le tāua o lea tapenaga.
O le taimi nei ua iai fanau e iai manaoga tumau ua aooga faatasi ma fanau e leai ni manaoga tumau ma o se itu lelei lea i le tutusa o avanoa e maua ai le ola aoaoina ma tausinio ai foi i le sailiga o le poto ma le atamai i mataupu eseese o loo aoaoina i totonu o aoga.
