I le sauni atu ai o le tatou atunuu e faafeiloa’i le pepe o le Kelisimasi i le Aso Tofi o lenei vaiaso, o le a lē avea taimi avanoa mo fiafia e tuu ai tapenaga masani e tusa o aiaiga o le tulafono o le puipuiga o le saogalemu mai le tagofia o le ‘avamalosi.
O lea ua faailoa e le komiti o le ‘avamalosi o loo aofia i le auaunaga a le matāgaluega o le tiute itula e tatala ma tapunia ai le faatauina o lea oloa e amata atu i le tauafiafi o le Kelisimasi e oo i le aso Kelisimasi ma le aso ua tuana’i lea aso faailogaina le aso 26 lea o Tesema.
O falekalapu e tatala mai le 6 o le afiafi o le aso 24 o Tesema ae tapunia uma i le tasi o le vaveao o le Aso Faraile.
O fale’aiga e faatau ai le ‘avamalosi e tatala foi i le 6 i le afiafi o le aso 24 e oo i le tasi i le vaveao ae o faleoloa mo le faatauina o le ‘avamalosi e tatala mai i le 6 i le afiafi o le aso 24 o Tesema ae taofia uma le toe faatauina i le 10 i le po.
O aiaiga masani o le tulafono, a lē usita’ia itula faatapulaa ua aiaia e ono se’i mo se taimi lē tumau poo le aveese loa o le laisene o loo faatau ai le ‘avamalosi.
Mo si o tatou atunuu atoa i soo se tafa o le kelope aemaise o Samoa ia manuia tele le Kelisimasi.
Se’i aulia le Aso Gafua o le vaiaso fou o muamua tatou toe feiloa’i ae manuia mālōlōga o le Kelisimasi.
