E foliga ua toe i luga foi o mataupu e talanoaina e le toatele le tulaga lea o ē faia o osofaiga i le vaveao poo le taeao po foi, dawn raids style tactics ina ua toe laga foi e le faipule o le Green o Chloe Swarbrick ia ituaiga tulaga ma ia ta’ua ai ua tatau ona iai se alafua e faataatia mo tagata ua ova aso i Niu Sila ia maua ai ni nofomau.
O se mataupu ua feeseeseai ai finagalo ma le alii o David Seymour ae na amata ona toe oo le mataupu lea i lipoti a le aufaasalalau ona o le case a se tagata faigaluega kamuta na aveesea mai lona fale e leoleo ma sui o le immigration i le masina talu ai a o vaai iai si ana fanau e pei ona faamatala e lana loia.
O se mataupu ua faailoa ai e le Ofisa Sili o le matagaluega i le Aso Faraile talu ai, ua taofia mo le taimi nei le faiga lea o siaki compliance checks mo tagata overstayer i itula i fafo mai o taimi faigaluega.
Talu mai le masina o Mati o le tausaga nei ua faailoa i lipoti pe ā ma le 14 afe tagata e ova aso o loo iai i Aotearoa ma ua faailoa e le minisita o Femalagaa’iga, Michael Wood o loo ia vaavaai nei i fautuaga i le tuuina atu o se avanoa, amnesty mo i latou ia e 14 afe ma o le a faia se faaiuga i se taimi e le o toe mamao.
Ina ua fesiligia la le taitai o le ACT David Seymour i le faatalanoaga a le AM i sona finagalo i le tulaga lea i amnesties mo le 14 afe o tagata overstayer sa ia faailoa e ao i le malo ona faaeteete i le mataupu lea i overstayers ma e ono iai se aafiaga le lelei o lea tulaga mo tagata o loo fia asiasi mai i Niu Sila mo se tafaoga.
Fai mai Swarbrick o lona talitonuga ua talafeagai tonu amnesty ia e ta’ua mo i latou o loo ova aso i le atunuu.
O loo faatalitali nei le toatele i se faaiuga a le minisita i lea mataupu.
