O le tusi saisai na faatonuina e le Faamasinoga Sili a Samoa e pu’e ma avatu ai Talalelei Pāuga o se tagata nuu o Ausetalia e tali le moliaga o le faufau e tagatavale lē sa avea ma Palemia o le atunuu le susuga Tuilaepa Lupesoliai Sailele Malielegaoi o le autū lea o le talosaga a Talelei e ala i lana loia ina ia faaleaogā le moliaga.  

O loo faavae lea finauga i le mau a le itu talosaga e leai se aogā faaletulafono o le tusi saisai na poloaina ona e le’i sainia e se faamasino o le faamasinoga a le atunuu.  

I le suesueina o le mataupu ua faaalia ai foi i le finauga a Talalelei ma lana loia o le faamasino na faatonuina le tusi saisai e faaituau ona sa iai se ata na salalau i luga o le Facebook na vaaia ai le faamasino le susuga Leiataualesā Daryl Clarke ma lē sa avea ma Komesina o Leoleo Fuiavailiili Egon Keil.  

O loo teena malosi e le Loia a le Ofisa o le Loia Sili a le Mālō le talosaga atoa a Talalelei Pauga ma lana loia i le mafuaaga e leai ma ni mau e faamaonia ai ae tasi le autu o le talosaga ia taofia ai leisi vaega o le faamasinoga i Ausetalia e faia ia Iuni e toe tulai ai lē o loo molia lea o loo iai se poloaiga a lea faamasinoga e aumai faapagota i Samoa e tali i moliaga. 

A’o tālia ai la se faaiuga o le talosaga a Talalelei Pauga e faaleaoga le tusi saisai ma faaleaoga ai ma lona moliaga o lea ua faatulaga mai e le faamasinoga sili a le atunuu o le Aso Tofi o lenei vaiaso e suesue ai le talosaga a Lema’i Faioso Sione ma Malele Atonu Paulo e taofi taualumaga o le la faamasinoga i le moliaga o loo molia faatasi ai o le taupulepule e faaoo le maliu i lē sa avea ma Palemia.