Faatali su’esu’ega e iloa ai pe na faatino se siaki o le puipuiga a le Fofoga Fetalai ma le Minisita o Faamasinoga

December 5, 2024
Samoa
Tusia: Galumalemana Autagavaia Tipi Autagavaia

Ua faatali nei le Minisita o Pulega o Malae Vaalele i se lipoti o sa’ili’iliga o loo faia i le mataupu na lipotia i le vaiaso nei, lea o loo tuua’ia ai le Fofoga Fetalai ma le Minisita o Faamasinoga i le lē faia o le la siaki o le puipuiga o le saogalemu, ina ua la faaaogā le vaega mo pasese taualoa le VIP lounge e ulufale ai i le vaalele a le Air New Zealand i se malaga mai Samoa mo Aukilani i le Aso Tofi na te’a nei.

O loo teena e le Fofoga Fetalai ma le Minisita o Faamasinoga lea lipoti, ae i se fesoota’iga i le Minisita o Pulega o Malae Vaalele o loo iai le vaaia ma le faagaioia o le nofoaga mo pasese taualoa i le malaevaalele faavaomalo i Faleolo, ua faailoa ai e le minisita le tofa Olo Afoa Fiti Vaai, o loo iai se sa’ili’iliga o loo faia ina ia maua tonu ai le tulaga na tupu ina ua tuua le atunuu e le Fofoga Fetalai ma se tasi o Minisita o le Kapeneta.

O se lipoti mai lea sa’ili’iliga o le a maua ai sona finagalo e faatatau i lea mataupu.

Ua faailoa foi e le minisita o le faiga faavae o loo faaaogā mo pasese taualoa e tuua Samoa o le a toe asiasi iai i se iloiloga e iloa ai poo tutusa uma kamupani vaalele o loo afea Samoa i lea faiga faavae, e pei ona tausisia e le kamupani vaalele o le Air New Zealand.

Ua faaalia e Olo e fia iloa i le su’esu’ega o loo faatino pe o tutusa uma le faiga e lea kamupani vaalele o pasese taualoa e faapitoa lea i minisita o isi atunuu e afea Samoa ma toe malaga ese faapea foi i minisita uma ma sui taualoa o le malo o Samoa.

Ua faailoa e le pule o lea kamupani vaalele i se lipoti a le nusipepa o le Samoa Observer i le Aso Lulu, o le a lē toe talia e le Air New Zealand ni pasese taualoa e faaaogāina le maota fou mo pasese taualoa poo VIP, ae ua na o Sui o Aigatupu, Palemia, Ao o le Malo, ma Minisita o isi malo faapea ma ta’ito’alua poo spouses o le vasega lea o tagata taualoa.

Na faaalia e le Minisita le tofa Olo Afoa Fiti Vaai, o le isi lea o vaega o le a toe silasila iai pe tatau ona toe faia se suiga, ona o le tausaga e 2015 na faamaonia ai lea faiga faavae a le kamupani vaalele a Niu Sila.