Ua maua se faamatalaga mai le faauluuluga o le polokalame o galuega faavaitaimi i le Matagaluega o Pisinisi Alamanuia ma Leipa, le afioga Lemalu Nele Seualuga, ua faailoa mai ai e lē o maua se faamaoniga ini tama faigaluega faavaitaimi mai lo tatou atunuu o loo taofia i le falemai ini manu’a mai se vevesi ma se isi tama faigaluega mai Samoa.

Ua faailoa foi e lē o maua se faamaoniga pe ua iai ma se isi taulealea ua molia e leoleo i le faia o lea gaioiga. O loo faatali nei le ofisa i se lipoti mai le sui sooupu o le polokalame o galuega faavaitaimi mo tagata Samoa i Ausetalia e manino ai lea tulaga, ae ua faaalia e Lemalu o le vaiaso na te’a nei na logo mai ai e nisi o kamupani i Ausetalia le mana’omia o se fesoasoani i amio a nisi o alii faigaluega faavaitaimi mai Samoa, ua onanā ma faamimisa. 

Faaalia e Lemalu ua leva ona ave le fautuaga i pulega o ia galuega afai o iai ni uiga faapea o nisi o tatou tagata ua tatau ona toe faafoi mai, peitai e lē o le tulaga lea o loo tali mai ai i latou e ana ia galuega.