Search
Search
Photo: Government of Samoa

Faatalanoa pea le fuafuaga o se atina’e manu papalagi i le polokalame o taumafa maua pea mo Samoa e lua

I le faato’ā maua ai o se pepa o faamaumauga o mataupu ua faamauina ai le ioega a ta’ita’i o le fono o le Atoa o Samoa sa usuia i Amerika Samoa i le vaiaso ua mavae, ua faailoa i le vaega o mataupu faasino i le atina’e o faatoaga ma Faigafaiva, le faaauau pea ona faatalanoa o le fuafuaga o se atina’e manu papalagi poo povi i le naunautaiga o ta’ita’i o faigamalo a Samoa e lua ia faatupula’ia le tulaga maua pea o taumafa, ma le autu o le fuafuaga ia mafai ona maua e le au failafumanu papalagi ni povi e faaauau ai pea a latou atina’e.

E leai se faamatalaga i le pepa o faamaumauga o mataupu ua iai le ioega a le fono o le Atoa o Samoa o afea ai ni fanua o le Malo o Samoa e tuuina atu mo sea fuafuaga, ae o loo faamauina i lea pepa o mataupu ua ioeina, le finagalo o ta’ita’i o Malo e lua e lē o se matafaioi poo se tiute o se Malo le faagaioi o se faatoaga faapei o se lafumanu papalagi i se tulaga faapisinisi poo se commercial farm.

O lea ituaiga o fuafuaga e fitoitonu ma le vaega o le au faipisinisi tuma’oti.

O lea foi ua faailoa i le pepa o faamaumauga o mataupu ua faamaonia i le mae’a o le fono o le Atoa o Samoa, o le a faaauau pea talanoaga i le mataupu i le atina’e lafu manu papalagi e iai uma Samoa e lua, ae e ao ona silasila pe iai se fanua e faatino ai, atoa ai ma lona faatupeina.

O le faaauauina pea o talanoaga i le fuafuaga lenei, o le a sainia ai se maliega poo se memorandum of understanding e faamautu ai, pe a mae’a uma tapenaga.

I le tulaga i fuafuaga e faaulufale atu aano o manu papalagi mo fefaataua’iga i le teritori faapea ai ma fuamoa, o loo faaauau pea ona faatalanoa lea mataupu ma le vaega e pulea taumafa a le Malo o Amerika, ae se’i vaganā nisi o aano o manufasi ua mafai ona ave faapea fuamoa ae lē o aveina i tulaga faapisinisi.

Tala sili ona faitaulia

Tala mai samoa

TALA FOU MAI SAMOA

TALA MAI NIU SILA

SAMOA UPDATE

PODCASTS

Listen on

FAATALATALANOAGA

POLOKALAME A LEOLEO

Keep uptodate with Radio Samoa activity & promotion

* indicates required