O le masina o Setema o le tausaga nei na faatama’ia ai e le malaia poo le afi le faleaoga o le aoga tulagalua a le nuu o Faleatiu.
O se tala fiafia mo fanau ma mātua o loo aooga o latou alo ma fanau i le aoga tulagalua, ona o lea ua faailoa e le sui faipule o Aana Alofi Numera 4 o loo aofia ai Faleatiu, ua faamautu nisi o fesoasoani mo le fausia o se faleaoga fou.
Ua silasila foi e ono faasafua se vaegatupe o le poloketi tasi le miliona e lagolago ai i le fausia o se faleaoga fou.
O le taimi nei o loo faaaogā laoa ma maota o le nuu e faatino ai vasega a le fanau, a o faatalitali ai se taimi o le a mautu ai sailiga fesoasoani o loo feagai ma le sui faipule o le itumalo ma le komiti o le aoga tulagalua a Faleatiu.
Le sui faipule o Aana Alofi Numera 4 le afioga i le Minisita o le Matagaluega o Puna’oa Faalenatura ma Siosiomaga, Afioga Toeolesulusulu Cedric Schuster.
O le mu o le faleaoga o Faleatiu na mafua i se faaletonu tau eletise.
E silia i le 200 fanau o loo aooga ai.
