O loo faata’ita’i nei e nisi o le au atamamai i tulaga tau togafitiga se tasi o taumafaiga e taofia ai le faafitauli ua mātele ina alia’e mai i le taimi nei i le to’atele o tagata, o le frozen shoulder poo le faalogoina o le gase i tau’au.

Fai mai le 9News o loo silasila nei foma’i i le tele o ituaiga faaletonu faapea ua lipoti atu aemaise lava i le itupa o tamaitai.

O le tulaga ua mātele ina maitauina ua tau lē mafai ona sii i luga le lima ma faamigoi e oo lava i sina gaioiga laitiiti e pei o le faamauluina o lavalava.

Fai mai foma’i o aafiaga o lea ituaiga tulaga e tai pei o le arthritis.

Ta’ua i le lipoti o le to’atele e aafia i le mataupu lea e oo atu lava i le ta’i 2 tausaga o aafia ai ae itiiti foi togafitiga o loo avanoa ane.

Ua faailoa mai o le tui ua faaigoa o le Corticosteroid o le a maua ai se fesoasoani aemaise i le taimi e faalogoina ai le gase o le tau’au ma itiiti ni gaioiga e mafai ona faatino.

O loo faia nei su’esu’ega i le mafua’aga o le tiga o loo faalogoina ma ua faailoa i le lipoti o nisi mea ua silafia mai le su’esu’ega, e faapea o alatoto fou ma nerves o le tino ua tupu faataali’o i le tau’au i le taimi lea e faalogoina ai le gase ma o i tonu o loo taula’i iai togafitiga e pei ona taumafaia nei.

O lea togafitiga e fai mai i le mata ma e saogalemu lava e pei ona ta’ua.Ua faia ai nei se faata’ita’iga aemaise i se taimi o loo vaaia ai pea e foma’i le faatupula’ia o lea ituaiga faaletonu aemaise i latou e aafia i le suka.

Puna o Faamatalaga: https://www.9news.com.au/national/new-treatment-for-excruciating-condition-with-numbers-on-the-rise/bf6abf56-e684-41d0-8073-4faa362bce9e