I le tuanai o le tausaga ma masina e fitu talu ona tulai mai le faalavelave i Afega na maliliu ai ni alii se toalua, ina ua aafia ini manu’a tuga mai se laau malosi, o le aso 4 ole masina o Novema ole tausaga nei o le a lau ai le faasalaga o Vaotu’ua Auleoleo Neemia, ua suia lana tete’e i lona ioeina o moliaga e lua o le fasioti tagata pa’i valea e fesootai i le faalavelave na tupu ile vaeluaga o le tausaga 2020 ma le amataga o le tausaga 2021 ma maliliu ai ia tagata e toalua o le nuu o Afega.

O le aso Gafua o le vaiaso nei sa faatulaga e valaau ai molimau e 31 a leoleo a leoleo e lagolago ai moliaga e fa faasaga ina Vaotuua. O moliaga ia e lua o le fasioti tagata faamoemoeina, ma moliaga o le umia o se laau malosi, ma le umia o se a’upega matautia e le faatagaina faaletulafono.

Peitai o le tuanai o le lua ma le afa itula o tatali le taimi e faagasolo ai le suesueina o molimau i luma o se laulau o faatonu, na valaau le mataupu ma faailoa ai le talosaga a leoleo ina ia toe faaui i tua moliaga e lua o le fasioti tagata faamoemoeina, ma moliaga o le umia o se aupega matautia o se laau malosi, ma le umia o se aupega e le faatagaina faaletulafono, ina ua maea se feutanaiga i luma o le faamasino ma le loia a le ua molia  ma malilie ai o le a ioe Vaotuua i moliaga e lua o le fasioti tagata pa’i valea, ae aveese lana tali tete’e.