I tapenaga o le taaloga a le au lakapi a Samoa ma le au malosi a le Barbarians o le a faia i Peretania i le Aso 27 o le masina fou o Novema o lea ua faailoa e le Pulega o le Lakapi Samoa lona talia ai o fuafuaga e filifilia nisi o tama lakapi a le atunuu o loo taaalo i Kalapu i Europa faapea Iapani o Ausetalia ma Niu Sila e fili ai se au mo lea taaloga.
O nisi foi o alo ma tama fanau a le atunuu o loo avea ma faiaoga i nisi o Kalapu Lakapi i atunuu i fafo ua filifilia latou te tapenaina se au a le atunuu.
O i latou ua filifilia e avea ma faiaoga ma faiaoga lagolago o nisi sa taaalo i le au a le Manu Samoa e pei o le afioga ia Lemalu Tusiata Pisi, Kane Thompson faapea Terry Fanolua.
O le taitai malaga ia filifilia ai Niuafolau Faautu Talapusi o loo faamautu nei i Lonatona i Peretania.
Faaalia e le faiaoga ulu a le Manu Samoa le afioga Vaovasamanaia Seilala Mapusua ua ia talia ma le fiafia le filifiliga o faiaoga ma faiaoga lagolago e feagai ma le tapenaina o le au a le atunuu mo lea taaloga.
Ua faailoa mai ua na’o le pau lea o le taaloga a le a taunuu ma ua filifilia iai nisi o tama lakapi a le atunuu o loo taaalo i fafo i Iapani, Ausetalia Europa ma Niu Sila ma o se taimi o i luma ona faalauiloa loa lea o i latou ua filifilia.
