I se ata pu’e mai le ABC Pacific, na faailoa mai se talanoaga a ni alii Samoa se to’alua, o nisi ua iloga i atunuu i fafo ma luga o upega tafa’ilagi.
O le tasi o alii e suafa ia Reni Maitua o sē na taaloi le lakapi liki ma le isi o le alii o Ronin Olsen, o sē ua iloga i luga o upega tafa’ilagi poo le social media i ana ata pu’e i lona gaosia lea o meaai taumafa Samoa, a o aumau ai i le malo tele o Peretania.
O lea ata pu’e mai le ABC Pacific na faasoa ai alii nei i o la manatu o nisi e iai sootaga papalagi ae o lea e iai lava le agaga e fesoota’i mo o latou pito Samoa.
Na faamanino e nei alii le agaga fiafia i le toe foi atu i le atunuu e toe amata fesoota’iga ma aiga i Samoa, o se faalogona uigaese mo i la’ua le toe maua ai o lea vaega tāua o lo olaga sa’ili’ili i o la tagata ma le faasinomaga.
O le tasi o itu na faailoa e Olsen, na tutumau ai lona sootaga ia Samoa o mea’ai taumafa, e pei ona ia faamanino le tele o mea’ai na te gaosia, ma faaali atu i luga o upega tafa’ilagi, o i lea na tatala ai le avanoa e faasoa atu ai ana taumafaiga ma isi aemaise o le fesoota’i atu i nisi o uso a tagata Samoa ma le Pasefika o loo aumau i Peretania.
Mo Reni Maitua, na ia faamatala ona faalogona i le taimi faato’ā pale mai ai i se suafa matai i le 6 tausaga talu ai, na iai ia te ia le lagona o lona lē mafaia ona tauaveina o lenei pitolaau, ae i lana savaliga i le sa’ili’ili pea i lona tagata, ua iai lona agaga o le fia auauna ma tautua mo lona aiga.
Na auai atu Ronin Olsen i le faatasiga a lo latou aiga o saofa’i i le afio’aga o Moataa.
Puna o Faamatalaga: https://www.abc.net.au/pacific/reni-maitua-and-ronin-olsen-talanoa/106162380
