Ua tele finagalo sa lagalagā i luga o upega tafailagi i le mataupu poo le gaioiga a le susuga ia Tasi lea sa ia faaleagaina ai ni mea totino o talitonuga o le Ekalesia Katoliko.
O le saunoaga a le afioga ia Patele Michael Endemann mo le susuga ia Tasi i lana gaioiga sa fai i le faatusa o Maria, o le matuā malovale lava (tulou) i luga o le leai o sona malamalamaaga i lana mea o loo fai ma le faatuatuaga a le Ekalesia Katoliko e ala ai ona faatuatua ma faaaloalo ia Maria.
E eseese ekalesia ma a latou talitonuga, e eseese foi ekalesia ma a latou faatuatuaga i mea nei o faatusa.
Talu mai le feagaiga tuai, sa faatagaina lava e le Atua le faatusa, e pei ona fetalai le Atua ia Mose e fau le faatusa o le gata apamemea.
Na tuuina foi e le Atua ia Mose tulafono e 10 e ta’ita’iina ai lona nuu o Isaraelu.
Ma o le talitonuga o le Ekalesia Katoliko ia Maria, o Maria e lē o se Atua.
A o ai la Maria? O Maria o le tina o le Atua.
Na auina mai e le agelu le feau ia Maria e faapea, ‘Amuia oe Maria i fafine uma, amuia le fua o lou alo, e ui e lei malamalama Maria i le uiga o lea feau na tuuina mai e le agelu ae sa talia atoatoa e Maria le finagalo o le Atua e avea o ia e auala mai ai le Alo o le Atua i le lalolagi pe liu tino tagata mai ai le Upu.
O le faatuatuaga a le Ekalesia Katoliko, a faapea ou te faaaloalo i lou tina, e tatau foi ona ou faaaloalo i le tina o Iesu o Maria.
Talu lava ona fanau mai Iesu, ma o le tatou faatuatuaga o Iesu o le Alo o le Atua, o le upu ua liu tino tagata, lea ua afio mai e mafuta faatasi ma i tatou.
O i latou o ē faatuatua ia Iesu, e tatau foi la ona alolofa ia Maria o le tina o Iesu.
O le soifuaga atoa o Iesu talu mai lona fanau mai i Peteleema, faasolo mai i lana galuega faatala’i, sa mulimulita’i ai lava lona tina o Maria, e oo foi i le maliu o Iesu sa mulimuli ai lava lona tina o Maria.
Sa tutū Iesu ma lona tina ma le soo ua alofaina, ona silasila atu lea o Iesu i lona tina, ona fetalai atu lea ia i lona tina, Sena e, faauta o lau tama. Ua faapea atu foi le soo, faauta o lou tina.
E alofa Iesu i lona tina, e faapena foi le faatuatuaga a le Ekalesia Katoliko e alolofa ia Maria le tina o Iesu na auala mai ai le faaolataga i le lalolagi.
Na saunoa le afioga Father Michael Endemann, o ia e tumu i le alofa ia Tasi i lona vaivai o loo iai, ae tatalo foi i le Atua e faamagalo iai ona e matuiā le mea sa ia faia, i lona faaleagaina o talitonuga faalelotu a isi tagata ma isi ekalesia.
Ae ua iai mea moni ua tutupu i mea faapea i tagata ua latou faaleagaina talitonuga o isi ekalesia.
E lē tasi se mea faapea ua tupu, e toatele i latou sa faia lea tulaga ae e iu leaga lava, ona ua latou faifai i le faatusa o Maria le tina o Iesu.
