O ni masina e lē o toe mamao ona faamautu lea o fuafuaga mo se konekarate e tusia le ata o le galuega o le a toe fausia ai le filī maketi i Savalalo i le nofoaga ua tuufua nei ua lē o toe iai se maketi, na faaumatia i le afi, ae na tutū ai faleie tetele ma faaaogā e pisinisi laiti e faatau ai laei, ma galuega taulima ma sa faagaioia ai foi ma faleaiga laiti.

O lea ua faasalalau tauofoga mo le sailia o se kamupani e tusia le ata ma fausia le galuega, o se tasi o fuafuaga a le faigamalo fou ua toe fausia ai lea maketi ma faaauau ona faaaogā e le aufaipisinisi laiti. O se galuega e pei ona silafia na fuafua e le faigamalo sa iai e faasee atu i Sogi e fausia ai le maketi peitai sa tetee iai le au faipisinisi laiti ona o le a lē toe maua ai ni faatau lelei, ona o le nofoaga i Savalalo o loo tumutumu iai le toatele auā o loo iai le nofoaga mo pasi la’upasese.

O le taimi nei i lea nofoaga ua na’o ni pisinisi o loo faagaioia i le nofoaga sa iai le faleoloa o faatoaga sosoo ma le maketi ua lē o toe iai, ae o loo iai le talitonuga o le toe fausia o se maketi i Savalalo o le a toe faafouina ai le silasila a le atunuu i se fausaga o se fale tele o le a fai ma vaaiga i lea vaega o le taulaga i Apia.