Ua faailoa e le malo suiga o le faatautaiga o galuega a le ACC i le maea faasalalau e le aufaigaluega o faamatalaga patino i tagata e ana talosaga

12 tagata faigaluega a le ACC poo le vaega o taui o faalavelave faafuasei na faailoa mai e le leitio a Niu Sila ananafi ua faamalolo ao suesue le faasalalau o faamatalaga faatatau i manuaga o clients ma toe amusia i luga o le Snapchat

O ni faalauiloa na faateia ai le toatele sa i le maota fono ananafi ma i le manatu o le taitai a le National o ia foi sa avea ma minisita o le ACC i tausaga ua alu, Judith Collins e tatau ona tutuli i latou nei ona e le faatagaina nei amio i totonu o se fale faigaluega o loo malu ai faamaumauga o tagata lautele

Ao talanoaina lenei mataupu i totonu o le palemene na faatalosaga ai e sui o le maota le tatau ona faia ni suiga i le faatautaiga o galuega a le aufaigaluega

I se tali mai a le na avea ma sooupu a le minisita o le ACC, Carmel Sepuloni ua faaataata mai ai ua agai mai suiga

Ao suesue ai le soli o taiala o loo limataitaiina ai galuega e tapu ai le faailoa o suafa ma faamatalaga faatatau i soo se tagata, e foliga mai e le fou lea amio e pei ona toe gagana ai se tasi sa galue i le call centre a le ACC i Hamiltone i tala a le leitio a Niu Sila