O se taule’ale’a 41 tausaga lona matua na faasala i le 148 aso e nofosala ai i le falepuipui, o se tagata molia muamua ua sili ona laki auā na tuu avanoa iai le faamasinoga e alu e fai kelisimasi muamua ma lona aiga, ona faato’ā alu ai lea e tuli le faasalaga i le falepuipui i Tanumalala.
O le Aso Faraile 19 o Tesema o le tausaga ua mavae 2025 na lau ai le faasalaga o Ropati Li’a ina ua faamaonia ni ona moliaga i lona faia o se solitulafono matagā na aafia ai se teineitiiti i le va o le 12 ma le 13 tausaga le matua.
O le teineitiiti na aafia sa vaetama e le tinā sa nonofo ma lē ua molia.
I le faamaonia o le moliaga o Ropati na faia ai le faasalaga a le afioga i le faamasino le afioga Leota Raymond Schuster e nofosala i le 5 masina ma le valu aso i le falepuipui poo le 148 aso.
Peita’i sa iai le agaga o le kelisimasi i le faamasino ma ia tuu avanoa ai i lē ua molia e muamua alu e fai kelisimasi ma lona aiga, a mae’a ona foi atu lea i le ofisa o leoleo i le aso muamua o le masina na te’a nei o Ianuari e momoli ai i le falepuipui e amata tuli lona faasalaga.
O le solitulafono na faamaonia o lē ua molia o lona ulufale faamalosi i le fale tā’ele o loo faamālū ai le teineitiiti.
Sa tagofia e lē ua faasalaina le ‘avamalosi i le taimi na ia faia ai lea gaioiga.Faaalia i le faai’uga a le faamasinoga o le faataitaiō o lē na aafia ina ua ulufale atu lē ua molia e aunoa ma sona iloa, na alu ane ai lona tinā ma aveese le taule’ale’a ma le fale tā’ele ma logo ai loa ma leoleo.
