O le fono faaletausaga a faauluuluga ma ta’ita’ifono faapea sui o komiti faatonu a faalapotopotoga tuma’oti a le Malo sa usuia i le Aso Lua o le vaiaso nei, ua ave ai se tuualalo ma se fautuga a le Minisita o loo iai le vaaia o ia faalapototoga tuma’oti, ina ia tausisia ta’iala ma faiga faavae ua faataoto e le Kapeneta, auā o le ālafua lea e mafai ona ausia ai pulega lelei.
O se ālafua foi lea e mafai ona faia ai faai’uga lelei i le vaaia ma le tausia o meatotino ma aseta a le Malo, ae faapea foi i faai’uga mo le faafaigaluegaina o ia aseta.
O le Minisita o loo iai le vaaiga o faalapotopotoga tuma’oti a le Malo le tofa Leatinuu Wayne Sooialo na saunoa e tatala lea fono faaletausaga i le faletalimalo o le Tanoa Tusitala.
O le fono faaletausaga na usuia i le masina o Iulai o le tausaga na te’a nei 2023 sa 27 faalapotopotoga tuma’oti a le malo, ae o le tausaga nei ua 25.
O isi faalapotopotoga tuma’oti e pei o le Faalapotopotoga o eleele ua avea nei ma se tasi o auaunaga i le matagaluega fou o eleele ma fuagāfanua, ae o le Pulega o malaetaalo ua avea nei ma se tasi o auaunaga i totonu o le isi matagaluega fou a le malo, le matagaluega lea o taaloga ma alaga’oa mo le fiafia o tagata.
