Ua faamanuiaina Asosi Faifaatoaga i Salafai e ala i se fesoasoani a le Matagaluega o Faatoaga ma Faigafaiva  i le naunautaiga a le malo e faaauau ona unai pea le atinaeina o faatoaga e ala i le faato’aina o le laueleele e pei ona masii atu ai le Minisita o Faatoaga ma Faigafaiva e feiloai ma sui o itumalo Vaisigano No.1, Vaisigano No.2, Falealupo ma Alataua i Sisifo. 

O se feiloaiga na folafola ai e le Minisita o Faatoaga ma Faigafaiva Laauli Leuatea Polataivao Schmidt fuafuaga alualu mamao a le faigamalo.

O se faatasiga na auai ai foi ma le Minisita o le Soifua Maloloina, le Minisita o Aoga Taaloga ma Aganuu faapea ma Minisita lagoga o ia Matagaluega o sui faipule foi o ia itumalo faapalota.

Na tufatufa ai ma nisi o meaalofa e pei o iliafi mo galuega e manaomia ai le atinae o faatoaga mai Asau e oo i Falelima. 

Taua e Laauli “O le auga ma le faamoemoe a le Matagaluega a maupopo Faalapotopotoga ua faigofie ma iloa e le Mālō manaoga o le au fai faatoaga uma i le atunuu.

O a mea ia e manaomia i le taimi lenei, o a mafatiaga, o a faafitauli. E lē mafai ona iloa e le Mālō pe afai tatou te lē faaleoina, Ae faafefea na faaleo? O lea ua faataatia mai le alafua tatou te fesootai ai i le ala sili ona malamalama ma vave ona fōia atugaluga ma faafitauli uma o loo tatou feagai ai”.

Na momoli foi le faafetai a le afioga i el Minisita i le Peresetene ma le Asosi o Faifaatoaga i Samoa i le naunau ina ia fai se Faalapotopotoga mo le motu tele i Salafai lea ua silia ma le 6 tausaga talu ona tulai mai le Asosi i Savaii. 

O lea fesoasoani o le a faia foi i le motu i Upolu i le vaiaso fou mo faifaatoaga ma fai lafumanu a Tūmuā.