Ua faagasolo nei le fonotaga tele a le Ekalesia Faapotopotoga Kerisiano Samoa lea o loo usuia i Malua. O lenei fonotaga e faia i tausaga uma e talanoaina ai mataupu a le Ekalesia ma auala e toe faaleleia ai latou auaunaga.
Peitai o le tausaga nei ua iai ni suiga i le faiga o lenei fonotaga e pei ona faasā ai o Ofisa Faasalalau i totonu o le lotoa o loo faia ai le fonotaga ae faapea foi le lē mafai ona auai atu o sui usufono o loo alala i Niu Sila, Ausetalia ma Amerika.
O le faiga fou la ua iai lenei tausaga o le faaaoga lea o tekonolosi faaonaponei e mafai ai ona auai sui o le Ekalesia o loo i atunuu i fafo.
E pei ona silafia o le tausaga na te’a nei e lei faataunuu ai se fonotaga a Malua ona o le pepesi o le faamai oti o le Koviti19, ae mo le tausaga nei lea ua agai le Ekalesia e faia seisi auala ina ia mafai aona auai a latou sui usufono.
O le taimi muamua foi lea ua faasa ai ofisa faasalalau ona agai i totonu o le lotoā mo ripoti o le fonotaga, e le’i faailoa mai se mafuaaga o lenei tapu, pau le vaega na vaaia e ofisa faasalalau i le taeao nei o se faasilasilaga i fafo o le auala e faasā ai le Media.
