I le tapunia ai o lola palota a ia itumalo ina ua maea ona toe tatala mo le lesitala ua faailoa e le  komesina o faigapalota ia latou faamaumauga le faaopoopo o tagata palota mo le itumalo o Faleata 4 ma Siumu, ae faaitiitia Vaa o Fonoti. O Faleata 4 sa 2,171 tagata i lana lola palota talu mai ona maea le palota tele ile 2021, ae o le taimi nei ua 2,253.  

E 96 tagata palota fou na lesitala ai e aofia ai i latou ua aulia le 21 tausaga le matutua, ma le 47 o tagata ua liliu atu iai a latou palota.

Oi latou ia sa lesitala ma palota i isi itumalo ae ua agavaa e liliu iai a latou palota ona o aiaiga e pei o le nofomau i totonu o le itumalo. I Faleata 4 lava e toalima tagata palota sa lesitala ai talu mai le palota tele ae ua liliu ese itumalo ua palota iai. 

O Siumu e 2,191 le aofaiga o tagata sa lesitala i lana lola palota ile palota tele o le tausaga 2021. O le maea o le toe lesitalaina o tagata palota mo lea itumalo ua faamauina ai se siitaga e 2,259. E 113 tagata palota fou, 21 tagata ua liliu iai a latou palota, ae toa sefulu tagata palota ua aveesea mai a latou lesitala ona ua liliu i isi itumalo.

Vaa o Fonoti sa 1,672 tagata sa lesitala i lana lola palota talu mai le palota tele, peitai e ui ina faamauina le 50 o tagata palota fou ua lesitala ile lola a lea itumalo, ua molimauina i faamaumauga mai le Komesina o faiga palota le faaitiitia o tagata palota lesitala ile lola a Vaa o Fonoti ao lumanai palota laiti, ile nao le 1,670. E toa 16 tagata ua liliu atu iai a latou paoota, ae toavalu ua liliu ese mai ai a latou lesitala ma ua agai i isi itumalo.

O faamaumauga o tagata palota maliliu ua faailoa ai o Vaa o Fonoti e onosefulu le aofaiga o e sa lesitala ile latou lola palota ua fai i lagi le folauga, o Faleata 4 ma Siumu e tutusa e tai 56 tagata palota ia la lola ua maliliu.