Ua molimauina i le lipoti lata mai a le soifua mālōlōina le iai o se pa’ū i le numera o tagata ua maua i le siama o le faamai Koviti-19 mai le aso 24 i le 26 o Me e pei ona faamauina e 235, e faatusa i le isi lipoti o le aso 22 i le aso 24 o le masina nei lava e 302. Ae i le lipoti lata mai ua faailoa ai ua oo atu nei i le 13,380 le aofaiga atoa o ē ua maua i le faama’i talu ona pesia le lautele o le atunuu. To’alima o loo taofia mo togafitiga ae leai ni gasegase o le koviti o taofia i potu tigaina.

O pasese malaga mai fafo ua faaopoopo foi le numela oi latou ua aafia ma oo atu ai i le aofaiga e 94 o tagata malaga mai fafo ua maua i le siama talu mai le aso 26 o Me. E to’afitu tagata malaga i le faigamalaga mai Fiti o le aso 24 o Me na maua ia latou su’ega ua aafia. To’atasi le tagata malaga mai Niu Sila o le faigamalaga o le aso 22 o Me ua aafia i le siama, to’avalu le pasese o le malaga mai Niu Sila o le aso 15 ae to’alua le pasese o le malaga mai Fiti o le aso 14 o le masina nei lava.

E lē o maua mai se faamaumauga i le lipoti o pasese uma o ia malaga sa faanofoesea i o latou aiga mo le fitu aso, pe o saogalemu e lei maua lava se isi i le faamai Koviti-19. I le aofaiga e 258 o gasegase o le faama’i sa auina atu i le falemai i Motootua mo togafitiga talu mai le aso 17 o Mati na pesia ai le lautele o tagata e to’a 222 ua tete’a i tua ua malolosi. O loo tumau pea le aofaiga e 25 o tagata ua maliliu ona o āuga o le faama’i.