I se taumafaiga e faamāmā le avega i le auaunaga tau le soifua mālōlōina, ua faailoa mai ai nei e le malo le faalauteleina o lana fuafuaga mo le faia o tuipuipui o le flu e aunoa ma se totogi ma o le a agavaa ai ma le isi 800 afe o tagata faaopoopo atu i ē na agavaa muamua.
O le to’atele la o i latou fou ia ua agavaa nei e aofia ai tamaiti mai le ta’i 3 tausaga e oo i le 12, talu ona maitauina le to’atele o le aofai o tamaiti i le vaitausaga lea ua taofia i falema’i ona o le flu.
O isi e agavaa ai i le fuafuaga fou lea e aofia ai tagata e iai mana’oga tumau ma o le a amata mafai ona faia tuipuipui i le aso muamua o le masina o afua nei, o Iulai.
Ua faailoa foi e le faatonu o le Pharmac, Lisa Williams e pei ona lipotia i le One News ua faateteleina le aofai o tagata e aafia i le flu ma ua aafia ai komiuniti ma ua tai pei lava o le koviti.
E to’atele ua talia ma le fiafia le fuafuaga e pei ona faailoa e le malo ma ua ta’ua foi i le lipoti o le Aso Lua lea o le a avanoa mai ai le isi tuipuipui faaopoopo lona lua o le koviti mo tagata Niu Sila o iai i tulaga lamatia tau le soifua mālōlōina ma i latou e ta’i 50 tausaga ma sili atu ma tagata tausi soifua o le soifua mālōlōina, healthcare workers.
