O le aoauli o le asō na faailoa ai e le Komesina o Leoleo, Andrew Coster fuafuaga a le matagaluega e toe faaopoopo ni vaega (units) o lo latou auaunaga e tali atu ai i soligatulafono a kegi poo gangs i totonu o Niu Sila.
Mai le New Zealand Police, na ta’ua ai e le Komesina ia Coster, o loo fetaia’i pea leoleo ma lu’itau e uiga i kegi ma o latou gaioiga faasolitulafono, ma o se galuega lē faigofie, peitai o loo latou galulue malosi e taofia le tele o soligatulafono e aafia ai i latou nei.
Mai i lipoti, na fofola mai ai fuafuaga mo lea vaega tāua a le Matagaluega.
I le faaopoopo ai o lea vaega fou o le a faapena ona agai ai ma le Matagaluega i o latou lālā uma o loo itumalo eseese e galulue e tuufaatasia fuafuaga ma ta’iala e tauala mai a latou galuega faatino e tali atu i gaioiga a kegi aemaise i taimi o leoleoga o maliu a ē na iai i kegi.
O le a faapena ona faatino nisi o talanoaga ma ta’ita’i o lālā eseese a Leoleo e uiga i lenei vaega tāua.
Ae na ta’ua e le Komesina, Andrew Coster, i le atia’e ai o lea vaega fou o le a faatupulaia ma siitia le tomai ma le agavaa o sui galulue uma, ma o le a galulue faatasi ma ē e mua’i tali atu i faalavelave e tulai mai, aemaise o le tali atu i soligatulafono e aafia ai fualaau faasāina ma soligatulafono e fafau (organised crime) e vaega nei poo kegi.
“Policing gangs and serious offenders is an all-of-Police priority. The new gang units will boost our focus and capability, but they are not working alone – our whole frontline is involved in preventing the crime and harm caused by methamphetamine, organised crime, and gangs, whether through road policing, organised crime investigations, prosecutions, or prevention activity”, Andrew Coster.
E manatu le Komesina ma le Matagaluega o galuega ma fuafuaga nei, e faia ina ia mautinoa o loo saogalemu le mamalu lautele o le atunuu.
