Ua lipotia pea le siitia o le numera o tagata i lo tatou atunuu ua aafia po ua maua i āuga o le faamai o le dengue fever lea e mafua i se vairusi e feaveai e iniseti o le namu.

O lea ua faailoa e le Faatonu Sili Aoao o le soifua maloloina i le autusitala, o loo mataitu pea faamaumauga i vaiaso taitasi lea o loo iloa ai le faaopoopo pea o tagata e aafia i lea gasegase.

O faamaumauga lata mai o loo faamauina ai le aofaiga e 80 o gasegase o le dengue fever ma e ui e leai se ola ma se soifua ua ma’umau ai, ae ua faaalia e le Faatonu Sili o le soifua maloloina le susuga Aiono Dr Alec Ekeroma, e tāua pea le faia o polokalame faalauiloa o auala o puipuiga mo le silafia e tagata.

O loo faamauina o fanau mai le 5 i le 9 tausaga o loo aafia i āuga o le dengue fever faapea nisi ua aulia le 60 tausaga o le soifua.

O le itu i Matu i Sisifo o le motu o Upolu faapea nofoaga faataamilo e tau lalata i le taulaga le urban area o loo lipotia mai ai tagata ua aafia.

Ua mae’a ona faailoa lautele e le matagaluega o le soifua maloloina fautuaga mo auaunaga tau soifua maloloina o loo agai iai tagata mo siaki faafomai ina ia tuuina atu vaega manaomia mo le faia o suega poo test mo i latou ua masalomia ua aafia i āuga o le dengue fever.