Ua oo atu nei le aofai o i latou ua fano le soifua ona o le vairusi Koviti-19 i Samoa i le to’a 24 ina ua faailoa ma faamaonia e le Matagaluega o le Soifua Maloloina e to’atasi le maliu fou ua fa’amauina i totonu o lenei 48 itula.
O lē ua maliu o se tinā 59 tausaga le matua, e i ai ona gasegase tumau ma e le’i faia fo’i sona tui puipui o le Koviti – 19. Ua fa’amaonia mai foi e le Matāgaluega o le Soifua Mālōlōina le pesia ai o i latou fou e to’a 268 mai le mamalu lautele o le atunu’u i totonu o lenei 48 itula mai le 2:00 i le aoauli o le Aso 08 Me 2022 aga’i le 2:00 i le aoauli o le Aso 10 Me 2022.
Ua si’itia ai i le 11,237 le aofa’i o i latou ua a’afia i le siama o le Koviti – 19 i Samoa talu ona sao i tua le fa’ama’i i le Aso 17 Mati 2022. E to’afa (4) gasegase o lo’o taofia nei i le Falema’i i Moto’otua.
E le’o mapu le taulogologo a le Matagaluega i le atunuu ina ia faia tui puipui o le Koviti auā o le puipuiga sili lea mo tagata uma e tete’e atu ai i le fa’ama’i ae le gata i lea ia tausisia ma usitā’ia le faia o tali fofoga ma le nofo ma le tutū mo le 2 mita mai le isi tagata aemaise i nofoaga faitele.
