I le lipoti lata mai a le Matagaluega o Soifua Maloloina ua faamaonia mai ai le faaopoopo o le maliu e to’atasi i totonu o le 48 itula mai le aso 26 o Me i le aso 28 o le masina lava lea ma oo atu ai le fuainumera o i latou ua maliliu i le faama’i i le to’a 26. 
 
O lē ua maliu o se tamā 71 tausaga o le soifua, e iai ona gasegase tumau ma ua mae’a uma ona tuipuipui e lua o le Koviti-19.   
 
Ua lipotia mai foi e le Matagaluega le pesia ai o i latou fou e to’a 119 i le faama’i o le Koviti-19 i totonu o lenei 48 itula. E to’alima i latou ua aafia o loo taofia nei i le Falema’i i Motootua, ma ua siitia ai le aofa’i o ē ua pesia i lenei siama i totonu o Samoa talu ona sao i tua le faama’i i le aso 17 Mati 2022 i le to’a 13,499. 
 
O loo fautuaina pea e le Matagaluega le mamalu o le atunuu ina ia faia tali fofoga i taimi uma, tausisia le nofo ma le tūtū vāvā i nofoaga faitele ma ia faia lou tuipuipui auā o le puipuiga sili lea mo tagata uma e tetee atu ai i le sosolo faaafi o le faama’i. 
  
Ua talosagaina foi se tasi ua masalomia le aafia i āuga o le faama’i, ina ia nonofo lelei i aiga ma faanofoesea i se nofoaga faapitoa e taumamao mai i latou e pele ia te oe, seia toe mautinoa ua saogalemu ma ua toe faafoisia le malosi o le tino. O le puipuiga o tatou aiga, uo, ma ē pele ia i tatou o le tatou galuega fai faatasi lea.