E ui o loo faasolosolo siitia le numera o i latou ua toe manuia mai auga o le faama’i Koviti-19 i aso taitasi ae o loo matauina pea le faaopoopo foi o tagata fou ua pesia ma aafia i totonu o le 24 itula.

Ua fa’amaonia mai e le Matāgaluega o le Soifua Mālōlōina le fa’aopoopo ai o le to’a 123 oi latou fou ua pesia i le siama o le Koviti-19 i le mamalu lautele o le atunu’u mai le Aso Gafua, 04 Aperila 2022 ma ua si’itia ai i le 2,566 i latou ua a’afia i le atunu’u lautele talu ona sao i tua le fa’ama’i.

I lea aofa’i, e toe to’a 1524 i latou o lo’o a’afia pea ae to’a 1038 i latou ua fa’amaonia le toe manuia ma malolosi atoatoa. I le taimi nei, e 14 i latou o lo’o fa’anofoesea i nofoaga fa’apitoa i le falemai i Moto’otua.

O loo faaauau pea ona faagasolo tui puipui mo Itumalo ae le gata i lea o le faatinoga o tui puipui mo fanau laiti mai le 5-11 tausaga le matutua.