O soo se taumafaiga a o tatou tagata i atina’e tau pisinisi, e mafua ona ola ma umi ona faagaioi o le lelei o le pulega, aemaise o le lagolago a tagata.
O le Moana Rentals o se tasi o auaunaga tau pisinisi i Samoa sa matuā afaina ana tupe maua e pei o isi pisinisi faapea e maua ai taavale e totogipau mo le faaaogāina, ona o aafiaga o le tamaoaiga o le atunuu i taimi faigata o le faama’i Koviti-19.
Peitai o le lua lenei o tausaga talu ona toe tatala auaunaga uma tau pisinisi i tulaga masani ma toe foi femalagaa’iga i le tulaga sa iai muamua a o lei oo mai le faama’i koviti, ma ua toe amata ona foi pisinisi taavale totogipau i tulaga lelei ona ua to’atele tagata e faaaogāina aemaise o tulisi e malaga tafafao mai i Samoa.
O ia tulaga lelei ua toe faaopoopo ai foi ma le auaunaga a le Moana Rentals i le tatala ai o se isi ona ofisa fou e lata i le malaevaalele faavaomalo i Faleolo o loo iai le isi ona ofisa, auā le tautuaina o le atina’e o tagata tafafao ma le atunuu lautele.
Ua faaopoopo iai ma se isi o ona ofisa i Alafua ua autū iai lana auaunaga i le li’o o le taulaga o Apia.
O le faafetai lea a se tasi o faatonu o le kamupani le afioga Tuala Peseta Faimalotoa Allan Stowers, i le lagolago a le atunuu ma le vaega o tulisi e afea Samoa ona o le faaaogāina o le kamupani.
Ua faafaigofie atili lana auaunaga i le tatalaina o lona ofisa fou i Faleolo e lē mamao ma le malaevaalele faavaomalo.
Ua faafetai ai foi le tamaitai Pule o le Moana le afioga Liliolelagi Anette Chang, i le pulega o malaevaalele le Samoa Airport Authority i le galulue faatasi ua mafai ona faatūina ai lo latou ofisa i se vaega o fanua o loo i le vaaiga a lea auaunaga tāua a le Malo.
Faaalia e le tamaitai pule o se faamāmā avega i le atunuu le ofisa fou, e lē gata i ana paaga ae o lana aufaigaluega i le siitia ai o le tautua i le atunuu.
Ua iai le fuafuaga a le kamupani i le lumanai, e faatūina so latou ofisa faaopoopo i le motu tele i Salafai mo le mamalu o le atunuu i Puleono.
