O Novema o le tausaga na tea nei na filifilia ai le afioga Lesatele Rapi Vaai o se tasi sa avea ma faamasino sinia o le Faamasinoga Maualuga a le atunuu, e na te tauave le tofiga Peresetene o le Faamasinoga o Fanua ma Suafa mo le 12 masina.

O le masina fou o Novema e mae’a ai le 12 masina ma ua toe faia le faaiuga a le Komisi o galuega a le faamasinoga o fanua ma suafa, e toe faaopoopo le isi tausaga e tauave ai e le Afioga Lesatele Rapi Vaai le tofiga Peresetene.

O teuteuga o le faavae na pasia e le Palemene i le tausaga e 2020 o loo aiaia ai agavaa, ma le matua o le soifua e tatau ona oo iai le tautua a se tasi e avea ma Peresetene o lea faamasinoga tāua a le atunuu.

Na faamanino mai e le Ofisa Sili o pulega o le matagaluega o faamasinoga ma le faafoeina o mataupu tau faamasinoga lea aiaiga faaletulafono na faavae ai le faaiuga a le komisi o faamasinoga o fanua ma suafa.

Le Ofisa Sili o pulega o le Matagaluega o Faamasinoga ma le Faafoeina o Mataupu tau Faamasinoga, Susuga Papalii John Taimalelagi Afele.