Ua siitia nei i le 25 tagata ua maliliu i Samoa i le faama’i Korona vairusi poo le Koviti-19, ina ua faailoa e le Matagaluega o le soifua maloloina i le lipoti lata mai le maliu o se tamā 64 tausaga o lona soifua.
E iai ona gasegase tumau ma ua mae’a ona tuipuipui o le faama’i e aofia ai ma lona tui lona tolu le booster. Ua toalua ai tagata ua fano soifua i le faama’i ua mae’a tui e lua ma le tui faaopoopo lona tolu ua maliliu.
Ae o le lipoti lata mai e tusa o faamaumauga a le soifua maloloina mai le aso 15 e oo i le aso 18 o le masina nei o Me ua faaalia ai e 331 tagata fou ua maua i le siama o le Koviti-19 ae mai lea aofaiga e 325 o i latou mai le lautele o le atunuu, ae o le to’aono o tagata malaga mai fafo, ma ua faamauina ai le aofaiga e 12,382 ua aafia i Samoa i le faama’i. E to’afitu o loo taofia i le maota gasegase i Motootua.
Oi latou uma ua faamauina e le soifua maloloina ua maua i le faama’i sa maua mai lea i su’ega sa faia i maota gasegase ma falemai faaitumalo, o nofoaga o loo faia ai lea galuega faapea ma tagata sa faia lava e i latou a latou su’ega poo test ma faailoa atu i le auaunaga a le soifua maloloina. Ua 98,999 su’ega ua mae’a ona faatino.
