Ua tuuina atu nei e Ausetalia se faaaliga faaletulafono i le Twitter ma faatonuina ai le tuu ane o se faamatalaga pe o faapefea ona o latou faafetauia nisi o faamatalaga lē manuia o loo faia atu i luga o le latou platform.
O le Esafety commissioner i Ausetalia, Julie Inman Grant na ia ta’ua ua maua ane nisi faaseā faaopoopo e faatatau i faamatalaga e atagia ai lagona o le ita i luga o le Twitter i totonu o le 12 masina ua tuanai.
Na amata ona siitia le aofai o faaseā ina ua agai ane Elon Musk e faafoe le auaunaga lea ia Oketopa 2022.
Fai mai Grant afai ae lē tali ane le Twitter i le faaaliga lea i totonu o le 28 aso o le a feagai loa le kamupani ma faasalaga tupe e toeitiiti oo i le 700 afe i le aso mo le solia pea o aiaiga i tulaga e faatatau i auaunaga o loo faatinoina.
E le o faamauina i le lipoti se tali ane a le Twitter i le faaaliga ua tuuina iai.
