O lea ua toe aapa le Malo e faaolaola nisi o taumafaiga tau laau faatoaga e ala i le toe faato’aina o le fanua i faatoaga tetele, e toto ai niu eseese aemaise o le niu Samoa e sili ona lelei le peepee e maua ai.
Ua faailoa e le Minisita o Faatoaga ma Faigafaiva le toe agai e faatoa nisi o eleele o le Malo i le laau o le niu, ina ua fesiligia i le maota fono le tulaga lamatia o le lumanai o lea laau tau faatoaga, ona ua maualuga le faaaogaina i pisinisi o loo faatau atu ai le niu ma le tau ua oo i le sefulu tala i le niu e tasi, ae o loo iai foi isi pisinisi o loo gaosia le peepee o se oloa alumia tele i maketi i fafo.
Faaalia e le Minisita le susuga Laauli Leuatea Polataivao Fosi Schmidt ina ua tali i mataupu sa laga i saunoaga faalauaitele i le tala faaopoopo muamua o le tupe, e na o Samoa ma le atunuu o Papua Niu Kini sa iai taumafaiga e faato’a ai eleele i le laau o le niu, peitai mo Samoa i tausaga ua mavae na alu alu faaaoga fanua sa iai ia faatoaga tetele ua ola ma ua faaaoga niu, i nisi o fuafuaga e pei o le fanua i Olomanu ua faatu ai nei le falepuipui mo fanauiti.
Pe ana le suatia le eleele ma faatamaia ai le tele o niu lelei o lea faatoaga, na faaalia e le Minisita e faapenei ua tulai mai e tali i le manaoga o pisinisi o loo gaosia le peepee.
E iai le talitonuga talu ona moloaua le faaauauina o le atina’e o faatoaga niu o le faalapotopotoga o le Esetete Tausi, o le toatele o tagata faatau niu sa luu tupe i le faaaogaina o niu o ia faatoaga a le Esetete Tausi o se faalapotopotoga a le Malo.
