A o lei toe tolopo le fono a le Palemene i le asō, na toe saunoa ai le afioga i le Fofoga Fetalai e faaleo lona faanoanoaga, ona o le toatele o nisi o sui usufono sa lei auai i le fonotaga a le Palemene i le asō. 

Saunoa le Fofoga Fetalai, o le aso fono lenei, e lē o aofia i le latou kalena o polokalame o aso fono o le Palemene, peitai ona o le lafo sa faamaonia e le maota i le latou fono talu ai, o lea na atofa ai faapitoa ai le aso lenei, aso 17 Me 2022 mo le toe lipoti mai ai le Komiti o tulaga aloaia ma amio taualoa i le mataupu tau tulaga aloaia e pei ona faatonu ai e le fono aoao faitulafono. 

Saunoa le Fofoga Fetalai, o lona faanoanoaga ona sa silafia uma lava e le mamalu o le Palemene aemaise i latou o loo aafia i lenei mataupu, le tuuina atu o lenei mataupu i le komiti ma le taimi na faatulaga e toe tauaofia ai le palemene ma toe lipoti mai ai le komiti na latou suesueina lenei mataupu, ae o lea e matau mai e lē o iai nisi o sui faipule aemaise nisi o sui o loo aafia i le mataupu. 

O le faanoanoaga o le nofoa o le lē amanaia o le mamalu o le palemene. Se’i vagana o ni gasegase ma ni faalavelave tutupu faafuase’i, ona faalavelavea lea o le auai i galuegafai a le palemene; ae o isi uma tuatuagia e tatau lava ona faamuamua lo latou valaauina i totonu o le Palemene. 

O lea la ua toe tolopo ai le fonotaga a le Palemene e faato’ā toe usu le fono i le Aso Lua, 24 Me 2022.