O se kamupani vaalele i Ausetalia ua umia nei le lisi o le vaalele 737-800 o le Samoa Airways, lea sa faamoemoe e aumai mo malaga faavaomalo i le va o Samoa ma Niu Sila faapea ma Ausetalia. Ua mafai ona faatino lea tulaga ina ua mae’a ai ona soalaupule le maliega o le lisi mai lea e le kamupani vaalele a Samoa o le vaa lea sa feagai ma le soa komiti na filifilia e le Malo le faia o feutana’iga.
E lei maua se avanoa i le Minisita o loo vaaia le kamupani vaalele a le atunuu, ae o se finagalo o le minisita le tofa Leatinuu Wayne Sooialo i le lomiga a le nusipepa o le Sunday Samoan, o loo ia faailoa ai e 4 tesimale 6 miliona tālā Amerika ua faamautu ai le faamutaina o le maliega o le lisi, ma ua lesitala nei le vaalele i le kamupani o le Rex Aviation Australia. O le masina o Iuni o le tausaga nei na mae’a totogi atu ai le 3 miliona tālā Amerika o le lisi, ma ua totoe ai nei le paleni e 1 tesimale 6 miliona tupe Amerika.
O le mae’a ai o feutana’iga i le mataupu lenei ua faasaoina ai le 160 miliona tālā o le totogi o le lisi, ma ua faaalia e le minisita i lea lipoti ua silasila nei poo le isi lua i le tolu tausaga o muamua nei, o le a lē toe iai se auaunaga a le Samoa Airways mo malaga faavaomalo e faaaogā ni vaalele tetele poo jet service, ae o le a faaaogā auaunaga a kamupani vaalele e pei o le Air New Zealand, Fiji Airways, le Qantas ma le Virgin Australia.
Ua faailoa lea tulaga e le minisita o loo iai le vaaia o le Samoa Airways ae e lē o mapu le ta’ita’i o le Itu agai i lona finauina pea o le Palemia ma le Malo e toe silasila i le latou faai’uga i lona finagalo e tatau ona aumai se vaalele tele, i lona talitonuga e maua ai le fesoasoani mo le atunuu i le pa’ū o pasese.
Ua mae’a ona faailoa e le ta’ita’i o le Malo i le tamaitai Palemia le afioga Fiame Naomi Mata’afa, o le taofia ai e lana faigamalo o le aumaia o le vaalele tele 737-800 ua faasaoina ai le miliona o tupe a le Malo ma le atunuu i le faaauau pea o malaga faavaomalo e faaaogā ai ia ituaiga o vaalele tetele ona e taugata le faaaogāina i aiaiga faalisi.
